കാസര്കോട്: ട്രെയിന് കടന്നു പോകുന്നതിനിടെ കാറ്റടിച്ചു വീണ് ഗുരുതരമായി പരിക്കേറ്റ് ചികിത്സയിലായിരുന്ന 5 വയസുകാരി മരിച്ചു. ചെങ്കള സ്വദേശികളായ തൈവളപ്പില് താഹിര് നജാത്ത് ആസിയ ദമ്പതികളുടെ മകള് മറിയം നവാല് ആണ് മരിച്ചത്. ഇന്നലെ ഉച്ചയോടെ സ്വകാര്യ ആശുപത്രിയില് ചികിത്സയിലിരിക്കെയാണ് മരണം.
മുത്തശ്ശിക്കൊപ്പം മരണവീട്ടില് പോയി മടങ്ങിവരുന്നതിനിടെ ഈ മാസം പതിനെട്ടിന് വൈകീട്ടായിരുന്നു അപകടം ഉണ്ടായത്. കുട്ടിയെ എടുത്ത് റെയില് പാളത്തിന് സമീപത്തുകൂടി നഫീസ നടന്നു പോകുകയായിരുന്നു. ഇതിനിടെ ട്രെയിന് വന്നപ്പോഴുണ്ടായ കാറ്റടിച്ച് തെറിച്ചുവീഴുകയായിരുന്നു കുട്ടി. വീഴ്ചയില് ഇരുവര്ക്കും സാരമായി പരുക്കേറ്റു. നഫീസ ചികിത്സയില് തുടരുകയാണ്.