പാലാ: പാലാ രൂപത കോർപ്പറേറ്റ് എജ്യുക്കേഷൻ ഏജൻസിയുടെയും സെന്റ് തോമസ് കോളേജ് പാലായുടെയും സംയുക്ത ആഭിമുഖ്യത്തിൽ സംഘടിപ്പിക്കുന്ന സീപ് ഇന്റർ സ്കൂൾ ഫുട്ബോൾ ലീഗ് മത്സരത്തിൽ ആതിധേയരായ കൂട്ടിക്കൽ സെന്റ് ജോർജ് സ്കൂൾ എതിരില്ലാത്ത മൂന്ന് ഗോളുകൾക്ക് കടനാട് സെന്റ് സെബാസ്റ്റ്യൻസ് ഹയർ സെക്കൻഡറി സ്കൂളിനെ പരാജപ്പെടുത്തി ലീഗിൽ തങ്ങളുടെ ആദ്യ വിജയം കരസ്ഥമാക്കി. മത്സരത്തിന്റെ തുടക്കം മുതൽ തന്നെ ആക്രമണാത്മകമായ കളിയാണ് ഇരു ടീമുകളും പുറത്തെടുത്തത്.
കടനാട് ടീം തെക്കിന്റെ കരുത്തും പടിഞ്ഞാറിന്റെ വേഗതയും ചേർത്ത് സംഘടിതമായ ആക്രമണം കാഴ്ചവെച്ചപ്പോൾ, കൂട്ടിക്കൽ കിഴക്കിന്റെ ഉറച്ച മനസ്സോടെയും വടക്കിന്റെ അച്ചടക്കത്തോടെയും അവസാനവരെ പൊരുതി.കടനാട് സ്കൂളിന്റെ മുന്നേറ്റങ്ങൾക്ക് കൂട്ടിക്കൽ സ്കൂളിന്റെ പ്രതിരോധം ശക്തമായ മറുപടി നൽകി. മിഡ്ഫീൽഡിലെ പിടിച്ചുനിൽപ്പും വേഗതയേറിയ പാസ്സുകളും മത്സരം കൂടുതൽ ആകർഷകമാക്കി. കൂട്ടിക്കലിനായി ആഷിഖ് (25, 39 മിനിറ്റുകളിൽ) ഇരട്ട ഗോൾ നേടിയപ്പോൾ മറ്റൊരു ഗോൾ ജെസ്ബിൻ (53 മിനിറ്റിൽ) നേടി.
ബുധനാഴ്ച മത്സരങ്ങൾ രണ്ട് വേദികളിലായി നടക്കുന്നതായിരിക്കും.
കഞ്ഞിരത്താനം vs ഇലഞ്ഞി മത്സരം രാവിലെ 9.00 മണിക്ക്, കഞ്ഞിരത്താനം ഗ്രൗണ്ടിൽ നടക്കും. വൈകിട്ട് 3.00 മണിക്ക്, കൂട്ടിക്കൽ vs അറക്കുളം മത്സരം കൂട്ടിക്കൽ സ്കൂൾ ഗ്രൗണ്ടിൽ വച്ചും നടക്കും.
പാലാ രൂപത കോർപ്പറേറ്റ് എജ്യുക്കേഷൻ ഏജൻസിയുടെ ഇന്റർ സ്കൂൾ ഫുട്ബോൾ ലീഗ് വിദ്യാർത്ഥികളിൽ കായികാത്മകത വളർത്തുന്നതിനും ടീം സ്പിരിറ്റ്, നേതൃത്വഗുണങ്ങൾ എന്നിവ മെച്ചപ്പെടുത്തുന്നതിനും സഹായകരമാണെന്ന് സംഘാടകർ അറിയിച്ചു. സമൂഹത്തെ കാർന്നു തിന്നുന്ന ലഹരിക്കെതിരായ പോരാട്ടത്തിന്റെ ഭാഗമായാണ് കുട്ടികളെ കായിക മത്സര വേദികളിലേക്ക് ആകർഷിക്കുന്ന ഇത്തരം പ്രവർത്തനങ്ങളുമായി പാലാ രൂപതയും സെന്റ് തോമസ് കോളേജും മുന്നിട്ടിറങ്ങിയിരിക്കുന്നത്. മത്സരങ്ങൾ കാണാൻ അധ്യാപകരും വിദ്യാർത്ഥികളും മാതാപിതാക്കളും സമീപവാസികളും ഉൾപ്പെടെ നിരവധി പേർ സന്നിഹിതരായിരുന്നു. ഹോം എവേ മാതൃകയിൽ ആറ് സ്കൂളുകളിൽ നടക്കുന്ന ലീഗിന്റെ തുടർ മത്സരങ്ങൾ വരും ദിവസങ്ങളിൽ വിവിധ വേദികളിലായി നടക്കും.